الفرق بين أمريكا ومصر

 http://news.yahoo.com/s/ap/20101214/ap_on_go_ca_st_pe/us_muslim_teacher

اقرا الخبر ده  وفكر كويس فى معناه:

بيقولك إيه يا سيدي، مدرسة إعدادي مسلمة في أمريكا طلبت أجازة 3 أسابيع مدفوعة الأجر عشان تروح تحج والإدارة التعليمية اللى مدرستها تابعة ليها رفضت والمدرسة بعدها استقالت،  قامت حكومة الولايات المتحدة بجلالة قدرها قررت إنها ترفع قضية على الإدارة التعليمية لأنها "انتهكت" الحقوق المدنية للمدرسة المسلمة ومراعتش معتقداتها الدينية، وطلبت إن الإدارة التعليمية ترجعها شغلها تاني وتعوضها عن الضرر اللى حصلها...طبعاً الإدارة التعليمية مستقلة عن الحكومة وميقدرش السيد وزير التعليم الأمريكي يصدر توجيهات أو تعليمات للإدارة عشان تسمع كلامه واضطرت الحكومة إنها تتحمل مصاريف قضية وأتعاب محامين (من جيب دافع الضرائب الأمريكي) عشان ترجع للمدرسة المسلمة حقها.

بص للى بيحصل هناك وقارنه باللي بيحصل هنا:

1-     عندك مواطنين مصريين مولودين هما وآبائهم وجدودهم فى مصر ومفروض ليهم نفس حقوق كل المصريين ومع ذلك  بيقعدوا سنين وبيطلع عين أبوهم عشان يطلعوا تصريح لبناء كنيسة واحدة أو حتى تجديد مبنى كنيسة، ولو مكان الكنيسة في الصعيد ولا فى قرية ولا حتى فى حي شعبي في القاهرة بتلاقي سكان المنطقة المسلمين قاموا على المسيحيين أول ما يبتدوا يبنوا وهاتك يا تحديف طوب وتوليع حرايق وضرب وتكسير فى المسيحيين وبيوتهم ومحلاتهم لغاية ما الأمن المركزي يضطر كالعادة يتدخل ويوقفهم عند حدهم

2-     نفس المواطنين دول محدش منهم يقدر يترشح لرئاسة الجمهورية ولا يمسك رئيس وزرا أو وزير لأي وزارة حساسة

3-     نفس المواطنين دول بيدفعوا من جيوبهم ضرايب للدولة عشان تصرف على مرافقها، والضرايب اللى بيدفعوها  دي جزء منها بيروح على وزارة الأوقاف اللى بتصرف على كل المساجد الحكومية فى مصر،

وبتروح على إذاعة القرآن الكريم والبرامج والمجلات الدينية، وبتروح على مؤسسة الأزهر وجامعة الأزهر اللى ممنوع عليهم يدخلوها (تخيل كده نفسك يا أوس أوس مواطن مصري مسيحي بتدفع ضرايب عشان تمول جامعة ممنوع عليك إنت وأولادك تدرسوا فيها، مع إن أي طالب من كازاخستان أو إندونسيا أو الفلبين يقدر يجي ياخد منحة ويدرس فيها ويسكن وياكل ويشرب على حسابك)

عرفت ليه هما بيتقدموا واحنا بنتأخر؟ مش عشان هما قاعدين في أوضة ضلمة بيشربوا سيجار وويسكي وبيخططوا إزاي يتآمروا علينا، عشان إحنا معندناش حاجة مهمة اسمها "العدل"

كتبه: واحد صاحبي قوي مثقف وبيحب نجيب محفوظ