حب المحرومين

  

كلمة واحدة بس لو عرفنا كلنا نلاقيلها تعريف كل مشاكلنا هاتتحل،

عشان كدة بنحاول كل يوم وكل لحظة أننا نعرفها، نفهمها، أو حتى نحس بيها

بس كل ما بنحاول أكتر، كل ما بنبعد أكتر

الكلمة دي اديناها حرفين، مجرد حرفين، حرف للقلب وحرف للعين

بس ياريتهم كانوا 3 ، حرف كمان يكون للروح

لأن القلب والعين مش كفاية، زي المية بالظبط لازم ال 3 عناصر عشان نقدر نعيش بيها

وذرة أوكسجين بس مع هيدروجين مش ممكن بتروي دي ممكن تحرق وتدمر كمان لو اتحدت من غير ذرة ثالثة هيدروجين.

انا باتكلم عن اللي بنسميه حب

وبنتفق واحد واحد على أنه اسمى ما في الوجود

بس عشان الكلمة واحدة والتعريفات كتير فقد الحب قيمته، لأن قمته ببساطة مش في التعريف في حد ذاته بل في الإتفاق عليه

مش الاتفاق في الرأي ولا في الرؤية ولا حتى في طريقة التطبيق بس الاتفاق من أجل الاتفاق ... هو ده الحب

هو العلاقة الالهية اللي بتربط كــــــــــــل الناس دي ببعضيها

وأهم من كدة بتربط الانسان بالله

هي الاحساس الغريب اللي كلنا عجزنا عن تعريفه بأن كلنا كنا في يوم من الأيام جسد واحد اسمه كان آدم.

هو ده الحب، من غير تعريف ولا تصعيب.

أمال أيه علاقة ده بأني أحب أمي أو أبويا أو مراتي أو أولادي أو أصحابي؟

الاجابة في رايي أنها علاقة مرعبة

 لأنها علاقة عكسية لا تمت بصلة لمنظور الحب الحقيقي اللي اتكلمت عنه، فالحب الحقيقي مبني على الترابط من جهة الشبع، أما الحب العاطفي فمبني على الترابط من جهة الاحتياج.

دايما باعتبر كدة أن الحب هو الشئ الوحيد اللي بيميز الانسان عن الحيوان، ومافتكرش أنه ممكن حد يختلف معايا على الصورة دي، بس بمجرد ما تسمع خبر عن أم دبحت بنتها مثلا وتشوف في تاني لحظة غزالة بتضحي بحياتها عشان تنقذ بنتها، أو كلب بيموت وهو بيفدي صاحبه فأنت أكيد هاتفكر أنه ساعات الحيوانات  بتحب أكتر من البني آدمين. مش كدة؟

عارف ليه؟ عشان كنت فاكر أن هو ده الحب

شوية عواطف

مين فينا مش محتاج عواطف في حياته

خللي بالك أنا قلت "محتاج" ... يعني بتبني علاقة على نقص مش أكتمال

على "رغبة في الحصول" على شئ.

زي بنت بتحلم من زمان أنها تكون أم

أو ولد بيدور من وهو في المدرسة على بنت جميلة يحبها

أو شاب وحيد أتوحش صاحبه اللي كان بيونسه في وحدته ...

هو ده حب؟

ببساطة مستحيل تعرف تحب صح وأنت حاسس أن ناقصك حب

ومش هاتحس بالشبع إلا لو آمنت أنك مخلوق عشان محبوب

عشان تحب لازم تكون مؤمن بالله

ومؤمن أن الله اللي خلقك بيحبك

وعشان بيحبك مش ممكن ينساك لحظة واحدة ولا طرفة عين

وعشان مش ممكن ينساك مش ممكن يسيبك محتاج

يبقى أنت مش محتاج، لأنك لو حسيت أنك محتاج يبقى انت مش مؤمن أن ربنا بيحبك وحاسس بيك

لكن لو آمنت بالحب ده وشبعت منه، لأن مصدره خالق الكون بنفسه هاتتملي، وهاتفيض كمان وهاتنشر الحب حواليك في كل مكان.

هاتعرف وهاتحس ومش هاتستغرب أن...

الحب فداء وتضحية

الحب بذل وعطاء

الحب إنكار للذات

الحب حالة من الشبع والإمتلاء

الحب ... هو أن تحيا لا بعقلك ولا برؤيتك بل بالتسليم للتدبير الإلهي

أما العاطفة فهي حب غير مكتمل، حب فاني، منتهية ومؤقتة، ومتقلبة...

فكيف تتركها تقود لك حياتك؟ بدلا من الإيمان بالله المحب؟